Padlet programarekin egindako ariketa.

Kaixo! Gaurko saio praktikoan, beste gauzen artean muralak egiteko "Padlet" programa erabili dugu, beraz, hemen utziko dizuet zentzumenei buruz egin dudana:

Created with Padlet

Arratsaldean, laugarren gogoeta igoko dizuet, gero arte!

HIRUGARREN GOGOETA

 

Kaixooo!!

Modulu Astea zela eta, IKT-ko klaserik ez genuen izan pasaden astean, hori izan da hainbeste denbora idatzi barik egotearen arrazoia. Gauzak horrela, aste honetan zentratuko naiz, lehenik, astearteko klase magistralean, aurkezpenekin hasi ginen. Bi taldek aurkeztu zuten bere lana, hala ere, aurkezpenak sakonak izan ziren, saioaren ordu eta erdi osoa luzatu baitziren. 

Lehenengo aurkezpena IKT-k hezkuntzaren berrikuntzan izan duen eraginari buruzkoa izan zen, gaiaren aldetik interesgarria iruditu zitzaidanez, aditasunez jarraitu egin nuen aurkezpena. Besterik gabe, lan ona egin zutela pentsatzen dut. Beste aldetik, bigarren aurkezpenaren izenburuak “Internet eta Eskola” esaten duen moduan, eskolan Internet-aren erabilerak dituen abantailak eta izan ditzakeen arriskuei buruz hitz egin zuten. Aurkezpenaren ulermen egokia lortzeko, aurrekoan baino esfortzu gehiago egin behar izan nuen, izan ere, gaiaren inguruan interesa txikiagoa zen. Horrekin ez dut esan nahi nire ikaskideek ahozko diskurtso txarra egin zutenik, zeren eta ulermena errazteko teknika asko erabili zituzten, hala nola, azkeneko bideo hori.

Asteari jarraipena emateko asteazkeneko gela praktiko luze honetan egin duguna azalduko dut. Lehenik eta behin, premiazkoa eta oso baliogarria iruditu zait Karmelek eman digun azalpena, bibliografiak egiteko teknikak eta metodologiaren inguruan. Maila sinple batean bibliografiaren arauak ikasi ez ezik, egoera ezberdin edo konplexuetan zer egin behar den ere ikasi dut, adibidez, idazlea ez dakigunean edota liburu baten kapitulutik informazioa hartu dugunean, besteak beste. Azalpen hau ahalik eta lasterren behar nuen, iaztik egoki ulertu ez nuen kontzeptu bat baitzen.

Horrez gain, link eta markatzaileak gordetzeko “Delicious” plataforman erregistratu gara, aurretik ezagutzen ez nuen erreminta zen, hala ere, azkar ulertu dut haren erabilera eta oso baliogarria izango delakoan nago.

Horren ondorioz, “diigo” eta “connotea” deritzen plataformak ezagutu ditugu, markatzaile sozialak gure ordenagailuan soilik izan beharrean, sarean edukitzea ahalbidetzen dituzten plataformak, hain zuzen ere. Honetan erregistratzea oso prezipitatua iruditu zait, hala ere, etorkizunean baliogarriak izan daitezke.

Programak eta plataformak alde batera utziz, dokumentu batean oinarriturik, irakasleak Word programaren erabilera egokia azaldu egin digu, beti bezala eraginkorra izan da, izan ere, programak eskaintzen dituen aukera guztiak ikusi ditugu. Programaren erabilera menperatzen nuela pentsatzen nuen, baina saio honi esker Word programaren zabaltasuna eta erosotasunaz ohartu egin naiz.

Saioaren bigarren atalari dagokionez, musikak, ahotsak eta intonazioak bideo edo aurkezpen baten ulermenean izan dezaketen eraginean zentratu egin gara. Gauzak horrela, ahotsa eta irudien aldaketa guztiz proportzionala izan behar da, bideoaren sinesgarritasuna lortzeko. Hainbat adibideak ikusi ditugu baina bideo esanguratsuena Euskal Herriko nekazaritzaren ingurukoa izan da, ulermena errazten duten teknika asko erabiltzen dituelako. 

Amai dezadan esanez, saioak pasa ahala IKT-ren inguruan dudan jakin-mina handitzen dela, izan ere, gure bizitza profesionalean, gizarteak eskatzen duen moduan, ikasleei teknologien inguruzko ezagutza guzti hauek transmititzera beharturik gaude.  Transmisio hori egokia eta arrakastatsua izateko, irakatsi behar ditugun ezagutza guztiak erabat menperaturik izan behar ditugu, horregatik unibertsitatean ezinbestekoa da interesa eta lan egiteko gogoak erakustea.

Hurrengo astean berriz ikusiko gara. Ondo izan!!!

BIGARREN GOGOETA

 

Kaixo berriz ere!

Klaseko bigarren saio magistralean, web 2.0 ri buruz aritu ginen, informazioa hartzeko eta emateko balio duen filosofia bezala ulertu genuen, egilerik ez duena eta edonork erabil dezakeena. 

Honen inguruan, kolaboratibo eta kooperatiboaren arteko aldeak azpimarratu genituen. Inork ezer agindu gabe edonoren esku uzten denari kolaboratibotzat ezagutzen dugu, adibidez, apunteak hartzeko sare bat. Zerbait modu kooperatiboan eginda egoteak, talde batek egin duela esan nahi du, normalean taldeko buru edo agintari bat dago zerbait bideratzeko.

Horrez gain, egunerokotasunean erabateko estandarizazioa ematen ari dela ikasi genuen, bai hizkuntza informatikoan, baita tramankuluetan ere. Izan ere, formatuak oso estandarrak direnez, hedatzeko eta zabaltzeko arazorik ez daude. Gainera, honi lotuta programa guztien erabilera oso sinplea edo bakuna izaten da.

Horren ondorioz, irudi batean zeuden hainbat kontzeptuetan oinarrituz, azalpen oso zabala eman zuen irakasleak. Momentu guztietan, konbergentzia mantentzearen eta sarean parte hartzearen garrantzia azpimarratu egin zuen. Azkenik, klase honen inguruko hausnarketa egiteko, web 2.0 etengabe aldatzen edo moldatzen den gizarterako zerbitzu bat dela esan behar dut.

Atal magistrala alde batera utziz, gaurko saio praktikoan powerpointak egoki egiteko teknikak eta metodoak ikasi ditugu. Oinarri bezala, aurkezpen guztiak gradualak, argiak, tamaina egokikoak, errazak eta erakargarriak izan behar direla adierazi digu irakasleak. Modu horretan, erabiltzen dugun testuaren tamaina egoki aukeratzea ere oso garrantzitsua da, horretarako urruntasuna kontuan hartu behar dugu. Urrunetik apaindurak dituzten letrak ez dira egokiak, tamainaz aparte letra mota egokia ere aukeratu behar dugu.

Ulermena errazteko, koloreak zentzu handiz erabili behar ditugu, hala ere, kontraste handia topatzen badugu, ikusmena errazten du. Honen inguruan, interesgarria iruditu zaidan datu bat azalduko dizuet,  gorria gehien ikusten den kolorea da, baina urdinez oroimenean hoberen gordetzen den kolorea da. Horretaz aparte, letra etzana ezta azpimarraketa ere ez dira gomendatzen, gauzak nahasten dituztelako, batik bat.

Konturatzen ari naizen moduan, gure orainaldian ez ezik, etorkizunean ere erabilgarriak izango diren teknika asko ikasten ari gara irakasgai honetan, saio honi esker aurkezpenak egiteko trebatuago ikusten dut nire burua. Horregatik, irakasgaia eta bertan lantzen diren edukiak hain interesgarriak izaten jarraitzea espero dut!

LEHENENGO GOGOETA

Saio honetan, blog-ak sortzeko balio duen Google bilatzailearen plataforma bat ezagutu dugu, Blogger deritzona, hain zuzen ere. Hasteko, blog bat zer den azaldu ondoren, ikasle bakoitzak gure blog propioa egin dugu, posta elektronikoaren kontua erabiliz.

Behin bloga eginda, mezuak jartzeari buruzko azalpenak eman ditu irakasleak. Horrez gain, mezu horietan, bideoak, kantak edo soinuak, edota powerpoint-ak ere jartzen ikasi egin dugu HTML moduan. Jarraian, blog-aren diseinuarekin sartu gara, bakoitzak askatasuna izan dugu gure blog-a apaintzeko orduan, beraz, blog guztien formatua ezberdina izango da. Azkenik, blog-aren goiburuari irudi bat jarri beharko diogu eta horretarako, irudien tamaina edo memoria murriztu behar izan dugu “Microsoft office picture manager” programa erabilita.

Beste alde batetik, zer esanik ez dago eguneroko bizitza teknologiekin erabat erlazionaturik dagoela, beraz, ezinbesteko garrantzia duela arlo hau esan behar dut. Guk, LH-n erabili izan genuen metodologiak, izugarrizko aldaketak jasan ditu teknologien sorrerekin. Izan ere, praktikak egiten egon naizen ikastetxeak dituen baliabideak, guk genituenekin konparatuz, oso aurreratuak  daude, adibide argia daukagu arbela digitalaren kasuan. Gaur egun, ikastetxe gehienek arbela digitalak erabiltzen dituzte, eskola 2.0 –ren ideia asko hedatzen ari baita.

Alde batetik, lehen hezkuntzatik irakasteko teknologiak erabiltzeak, ondorio positibo asko sorrarazten ditu ikasleei, liburuak eta koadernoak desagertuz joango dira eta gainera, umeak nagusituko direnean, izugarrizko kontrola eta abilezia erakutsiko dute teknologien aurrean.  Horrez gain, informazioa lortzeko modu azkarrago bat eskaintzen du teknologiak, gainera, akats gutxiagorekin eta gainera, ikasleen motibazioa handitzen du. Horrela, modu ez presentzial batean ikasteko aukerak ere eskaintzen dira.

Ikasleen aldetik, bakarrik aurrerapenak eta onuragarriak diren ondorioak ikus ditzaket, irakasleen kasuan, aldiz, zailtasun batzuk ikusten ditut. Gaur egun, hezkuntzan dauden irakasle askok ez dute teknologiekin aritzeko abilezia, ez baitute formazio hori jaso eta muga eta oztopo asko aurkitzen dituzte metodologia berri honekin. Amaitzeko, Internet-etik bidaltzea lanak eta informazioa erabat eroso irudi daiteke, baina beharbada ikasle guztiek ez dute Interneteko konexioa beraien etxeetan, eta ikasle askok, sare sozialetan nabigatzeari garrantzi handiago ematen diote lanak egiteari baino. Beraz, ikuspuntu asko izan ditzakeen gaia dela esan behar dut. 
  

Honenbestez, hurrengo astera arte !!